376.மதங்கள் -- கிறித்துவம்

*
ஏசு எதற்காக இந்த உலகத்திற்கு வந்தாரென்று கேட்டால் கிறித்துவர்கள் என்ன பதில் சொல்வார்கள் என்பது அனைவருக்கும் தெரியும். எல்லா மக்களையும் பாவங்களிலிருந்து விடுவித்து, (அப்படி விடுபட்டோரை மட்டும் ) 
மோட்சத்திலிருக்கும் தன் பிதாவிடம் (கடவுளிடம்) சேர்ப்பிப்பதற்காகவே வந்தார் என்பார்கள். அந்தப் பிதாவின் குமாரனாக இவ்வுலகிற்கு வந்தார் என்பார்கள். அவர் இந்த உலகத்தில் பிறந்த எல்லோருக்காகவுமே வந்தார் என்பது அவர்கள் ஆழ்ந்த நம்பிக்கை.

ஆனால் என் பழைய பதிவின் 4-வது கேள்வியில் ஒரு பெரிய லிஸ்ட் ஒன்று கொடுத்து, இறுதியாக, சில காரணங்கள் சுட்டிக்காட்டி   //ஒரு ஜாதி அல்லது குலம் காக்க வந்த ஒரு tribal leader என்றே எனக்கு யேசு தெரிகிறார்//  என்று கூறியுள்ளேன்.  யூதர்களின் நம்பிக்கையும் அதுவே.  ஏசுவே பலமுறை யூதர்களே தன்னால் தேர்ந்தெடுக்கப்பட்ட மக்கள் என்று  சொல்கிறார்.வேறு ஓரிரு சுட்டிகளைக் காண்பித்து ... இல்லை .. இல்லை அவர் உலக மக்கள் அனைவருக்காகவும் வந்தவர் என்று விவாதிப்பதுண்டு. ஆனால் அப்படியாயின் நான் சுட்டிக்காட்டியவைகள் பற்றி என்ன விளக்கம்?

வந்தவர் யாருக்காக வந்தார் என்ற கேள்வியோடு இப்போது இன்னொரு கேள்வியும் சேர்ந்ததாலேயே இப்பதிவு.

லூக்காவின் நற்செய்தி 12- பகுதி 49 - 53

அஞ்சாதீர்கள் என்ற தலைப்பில், ஆயிரக்கணக்கான மக்கள் திரண்டு வந்து தன் பேச்சைக் கேட்கக் காத்திருக்கும்போது பேசியவைகள்: அதில் :

49: மண்ணுலகில் தீ மூட்ட வந்தேன். அது இப்பொழுதே பற்றி எரிந்து கொண்டிருக்க வேண்டும். (poetic / metaphor என்றெல்லாம் கூறுவார்களே அதே போன்று கவித்துவத்தோடு இதைச் சொன்னதாகக் கொள்வோம்.)

50வது வசனம் நமக்கு இங்கு தேவையில்லாததால் விட்டுச் செல்கிறேன்.

51. மண்ணுலகில் அமைதியை ஏற்படுத்த வந்தேன் என்றா நினைக்கிறீர்கள்? இல்லை, பிளவு உண்டாக்கவே வந்தேன் என உங்களுக்குச் சொல்கிறேன்.

52. இது முதல் ஒரு வீட்டிலுள்ள ஐவருள் இருவருக்கு எதிராக மூவரும் மூவருக்கு எதிராக இருவரும் பிரிந்திருப்பர்.

53. தந்தை மகனுக்கும், மகன் தந்தைக்கும், தாய் மகளுக்கும், மகள் தாய்க்கும், மாமியார் தன் மருமகளுக்கும், மருமகள் மாமியாருக்கும் எதிராகப் பிரிந்திருப்பர்."

ஒண்ணும் புரியவில்லை! இதற்காகவா வந்திருப்பார்? புரிந்தவர்களின் விளக்கங்களுக்குக் காத்திருக்கிறேன்...............

இன்னுமொரு கேள்வி:

ஏசு தன் ரத்தத்தையெல்லாம் சிந்தி  நமது பாவங்களுக்காத் தன்னையே தியாகம் செய்து கொண்டார். அவரது ரத்தமே நம்மை ஜீவிக்க வைக்கும் மருந்து; ஆதாமிலிருந்து இன்றைய மனிதன் வரை நாம் செய்த பாவங்களுக்காகவும், இனி பிறக்கப்போகும் மனிதரின் பாவங்களுக்காகவும் சேர்த்தே அவர் தன்னைத் தியாகம் செய்து கொண்டார் - இதெல்லாமே கிறித்துவர்களது நம்பிக்கை. 

லோத், லெவித்தியர், ஆபிரஹாம், தாவூது போன்ற  ஆபிரஹாமிய மதங்களைச் சேர்ந்தவர்கள் போல் அவ்வளவு பெரிய தப்பெல்லாம் நாம் செய்யாவிட்டாலும் மற்ற தப்புகளை நாம் இன்றும் செய்தே வருகிறோம். அவர் இவ்வளவு கஷ்டப்பட்டு நம்மை உய்விக்க வந்து போனபின்பும் நாம் திருந்தவில்லை. அப்படியென்றால், ஏசு சிந்திய ரத்தம், செய்த தியாகம் பயனற்றுப்  போய் விட்டதா? Is his incarnation a failed mission?


*

*