1020. . பற்றியெரியும் பஸ்தர் -- இந்நூலிலிருந்து சில பகுதிகள் ... 3

*

ஆதிவாசிகள், நக்சல்பாரிகள்மீதான காவல் நடவடிக்கைகள் கடந்த நாற்பது ஆண்டுகளில் அதிகம் மாறவில்லை. 1970களில் அம்ருதா ரங்கசாமி எழுதியது:

‘ஸ்ரீகாகுளம் பகுதியில் சிறு எண்ணிக்கையில் இருந்த நக்சல்பாரிகளைத் தேடிக் கண்டுபிடித்து அழிக்க ‘மத்திய பாதுகாப்புப் படை’ அனுப்பப்பட்டது. அப்படை அங்கிருந்த ஆதிவாசிகள் அத்தனை பேரையுமே தங்கள் சந்தேக வலைக்குள் கொண்டு வந்தார்கள். காவல் துறையே ஆச்சரியப்படும் அளவுக்குத் திரளான ஆதிவாசி மக்கள் பலரை ஆந்திரப் பிரதேச சிறைகளுக்குள் தள்ளி அடைத்தனர். அந்த மக்களை காவல்துறை சல்லடை போட்டுச் சலிக்கத் தொடங்கியது. இந்த முறையால் ஆதிவாசி மக்களிடமிருந்து நக்சல்பாரிகள் தனித்து, பிரித்து எடுத்துவிட முடியும் என்பது அவர்கள் நம்பிக்கை. எப்போதும் நடப்பது போலவே அந்தப் பாவப்பட்ட ஆதிவாசிகளுக்கு நியாயங்கள் ஏதும் நடக்கவேயில்லை. அதிலும் ஸ்ரீகாகுளத்தில் ஆதிவாசிகளுக்கு நியாயம் கிடைத்துவிடவே கூடாது என்பதே ஒரு சட்டமாகி விட்டது.¹⁵

******

.‘இப்போதெல்லாம் ஏக்கர் ஒன்றுக்கு 28 முதல் 80 லட்சம் வரை விலை பேசி வாங்கிக் கொண்டிருக்கிறார்கள். ஆனால், 2001ஆம் ஆண்டில் வெறுமனே  11,000  ரூபாய் மட்டும் ஏக்கருக்குக் கொடுத்து மக்களிடமிருந்து அடிமாட்டு விலையில் நிலங்களைப் பறித்தார்கள்.

                                                                                       ******

கிராமத்து மக்களைக் கைது செய்தும், பாலியல் பலாத்காரங்கள் நிகழ்த்தியும் அரசு தொடர் அநியாயங்களைச் செய்தது. கிராமத்து மக்களைப் பயமுறுத்தி, அவர்கள் தங்கள் நிலங்களை டாடா கம்பெனிக்கு விற்பதற்காகவே இந்த முயற்சிகள்.

டாடா கம்பெனி மூச்சுவிடவே இல்லை. எதுவுமே நடக்காததைப் போல்  பள்ளிகளில் விளையாட்டுப் போட்டி நடத்தினார்கள். மருத்துவ முகாம்கள் நடத்தினார்கள்.  தங்கள் கம்பெனியின் சமூகப் பொறுப்புணர்ச்சியை (கார்பரேட் சோஷியல் ரெஸ்பான்சிபிலிட்டி) வெளியே காட்டுவதற்காகப் போட்ட வெளிவேஷங்கள் இவை.

இன்று அதே வழியை ஸ்டெர்லைட் செய்கிறது. பன்னாட்டு குழுமங்களின் வழி முறைகளே இது தான் போலும்.

*******

ஆதிவாசிகளின் நிலங்களும் அதன் வளர்ச்சியும் முக்கியமானதாகக் கருதப்பட்டு, ஆதிவாசிகள் அவர்கள் நிலங்களிலிருந்தே புறக்கணிக்கப்பட்டனர்; விரட்டப்பட்டனர். இது பஸ்தாரில் மட்டுமல்ல. நாட்டின் அனைத்துக் காட்டுப் பகுதிகளிலும் இதே மோசமான நிலை நீடித்தது. சுதந்தரம் வாங்கிய நாளிலிருந்து இருபதாம் நூற்றாண்டு முடிவதற்குள் நாட்டிலுள்ள ஆதிவாசிகளில் நாலில் ஒருவராவது அணை கட்டுதல், தொழிற்சாலைகள் அமைத்தல், சுரங்கங்கள் அல்லது அது போன்ற அமைப்புகளின் வருகை ஆகியவற்றால் தங்களுடைய இருப்பிடத்திலிருந்து துரத்தியடிக்கப்பட்டிருப்பார்கள்.

******

ஆதிவாசிகள் யாருமே வியாபாரிகளல்ல. இந்த வியாபாரிகளும் ஒப்பந்தக்காரர்களும் குடியேறியபோது சாதாரண ஏழை மக்கள்தான். ஆனால், இங்கு வந்த பிறகு வியாபாரத்தில் செழித்தார்கள். வனப் பொருட்கள் விற்பனையைவிட சட்டத்திற்கு விரோதமான பொருட்களைக் கள்ளத்தனமாக வியாபாரம் செய்து கொழித்தார்கள். இப்படிப் பணம் கொழித்தது என்பதற்குச் சான்றாக ஒன்றைச் சொல்லலாம். பஸ்தார் பரிவாகன் சங்கம் என்ற போக்குவரத்துக் கூட்டமைப்பில் 6000 லாரிகளும் டிரக்குகளும் பதிவு செய்யப்பட்டுள்ன. அத்தனை வாகனங்களும் இந்த வியாபாரக் கும்பலின் வாகனங்களே. இந்த வியாபாரிகளில் முதல் நிலையில் இருப்பவர்கள் மார்வாரி மொத்த வியாபாரிகள். இவர்களது வியாபாரத் தொகுப்புகள் நாடு முழுவதும் உண்டு. இந்த மார்வாரிகள் மொத்தமாகப் பொருட்களை வாங்கி, தங்கள் விற்பனைச் சங்கிலிகள் மூலம் தங்கள் முகவர் மூலமாக நாடு முழுவதும் பிரித்து விற்றுவிடுகின்றனர்.

                                                                                             *******

மாவோயிஸ்டுகளின் உண்மையான பலம் அவர்கள் கைகளில் இருந்த ஆயதங்களில் இல்லை. அவர்களது கெரில்லாத் தந்திரங்களே அவை. அதைவிடவும் மேலாக, அமிதாவ் கோஷ் தனது 'Flood of Fire'என்ற நூலில் சொல்வதுபோல், அந்த மனிதர்கள் தங்கள் மண்ணுக்காக, தங்கள் வீட்டுக்காக, தங்கள் குடும்பத்துக்காக, தங்கள் பாரம்பரியத்துக்காக, தங்களுக்குப் பிடித்த அனைத்துக்காகப் போரிடும்போது அவர்கள் முகங்களில் தெரியும் உண்மையான ஆழ்ந்த உணர்வுகளே அவர்கள் பலத்தின் சரியான அளவுகோல்

                                        ********

லக்கி என்ற டோர்லா இனத்துப் பெண் தன் பெற்றோரின் கல்யாணக் கெடுபிடிகள் பிடிக்காமல் இயக்கத்தில் சேர்ந்தாள். அவள் இயக்கத்தில் ஒரு தெலுங்குப் பையனைக் காதலித்து மணந்து ஒரு பெண் குழந்தைக்குத் தாயானாள். ஆனால், போராளிகள் குழந்தைகளை உடன் வைத்து வளர்ப்பதை இயக்கம் விரும்பாததால் பிள்ளைப் பேறில்லா கிராமத்துப் பெற்றோர் ஒருவரிடம் தன் பிள்ளையைக் கொடுத்து வளர்க்கவைத்தார். ‘இப்போது என் குழந்தைக்கே என்னைத் தெரியாது’ என்று எங்களிடம் சோகத்தோடு சொன்னாள் அவள்.

*