1019. பற்றியெரியும் பஸ்தர் -- இந்நூலிலிருந்து சில பகுதிகள் ... 2

*

எனது ஆராய்ச்சிப் படிப்பின் ஆரம்பத்தில் எனக்கு மிகவும் இளம் வயது. அப்போது நான் இளைய மற்றும் முதிய ஆதிவாசி மக்களோடு நெருங்கிப் பழகி வந்தேன். அவர்களது மொழியான துர்வா எனக்குக் கைவசமானது. அவர்களது கிராமிய சமூக வாழ்வும், அதிலிருந்த பல நுண்ணிய விஷயங்களும் எனக்குத் தெரியவந்தன. எனக்கு மிகவும் பிடித்த மகிழ்ச்சியான, உற்சாகமான காலகட்டம் அது. நான் சிரித்து மகிழ்ந்த காலமும்கூட. .... அங்கிருந்த பெண்களோடு நெருங்கிப் பழகும் வாய்ப்பு அதிகமாகக் கிடைத்தது. ... அவர்கள் வாழ்வியலை உடனிருந்து தெரிந்து கொண்டேன். பகலில் அவர்களோடு இருந்துவிட்டு மாலையில் வீடு திரும்புவேன். பௌர்ணமி இரவுகளில் மெல்லிய ஒளியில் சுற்றி இருக்கும் வயல் வெளிகளைக் கண்டு மகிழ்வேன். அந்த ஒளியில் கதிர்களைத் தாங்கி நிற்கும் பயிர்களைப் பார்ப்பதற்கு மகிழ்ச்சியாக இருக்கும்.

******

காலை 11 மணி. அதற்குள் அந்தக் கிராமத்திலிருந்த எழுபது மண் வீடுகளும் முற்றாக அழித்தொழிக்கப்பட்டு, நெருப்பு மூட்டப்பட்டன. ஆடிய ஆட்டத்தில் அந்தப் படையாட்கள் களைப்படைந்து விட்டனர். தலைவர் போதுமென்றார். படையாட்கள் எரிந்துகொண்டிருந்த குடிசைகளைத் தாண்டி ஓரிடத்தில் சமைக்க ஆரம்பித்தனர். கைப்பற்றிய அரிசி சமைக்கப்பட்டது. ஓடித் திரிந்த கோழிகள் அவர்களுக்கு விருந்தாகின. உணவு தயாராகி, அனைவரும் சாப்பிட்டு முடித்தனர். மணி மாலை இரண்டு. இனி அடுத்த கிராமம் அவர்களது இலக்கு.

எரிந்த கிராமத்தில் தரை மட்டமாகிப் போன இடங்களில் புற்களும் பூண்டுகளும் முளைக்கத் தொடங்கின. பாதைகள் மறைந்து போயின. காடு மெல்ல கிராமத்திற்குள் நுழைந்து மண்டியது.

ஒரு கிராமம் எவ்விதத் தடயமும் இன்றி அழிந்துபோனது.

******

சார்கோவன்-கொண்டாபக்கா-ஹஹாலடி குன்றுகள், ராவோகாத் ஆகியவை வடக்குப் பக்கமாகவும், பைலாடில்வா மலைப் பகுதி தெற்கிலும் உள்ளன. இம்மலைப் பகுதிகளில்தான் இரும்பு தாதுப் பொருட்கள் நிறைந்து, நம் நாட்டின் ஆன்மாவைத் தன் பக்கம் சுண்டி இழுக்கிறது. இதன் மனித மாண்புகள் சிதைக்கப்படுகின்றன. காலத்தால் முந்திய இப்பகுதி இன்று ஒரு வேட்டைக் காடாக மாறி நிற்கிறது.

******

ஆதிவாசிகளுக்காக அரசு பிறப்பித்த பல திட்டங்களைத் தங்கள் சுய லாபத்துக்கே பயன்படுத்தி வந்தனர். இப்பகுதியில் உள்ள அரசின் வன இலாகா காவலர்களும், பட்வாரி என்றழைக்கப்படும் வரி வசூலிப்போரும் ஆதிவாசிகளிடமிருந்து அவர்களுடைய உழைப்பையோ அல்லது அவர்கள் வளர்க்கும் கோழிகளையோ ஏமாற்றிப் பெறும் வழக்கம் அதிகமாக இருந்து வந்தது.

ஆனால், இந்திய கம்யூனிஸ்ட் கட்சிக்காரர்களின் உழைப்பால் இது ஓரளவு தடுத்து நிறுத்தப்பட்டது.

******

காவலர் ஒருவர் கிராமத்துக்குள் நுழையும்போது கிராமத்தின் மூத்தவர்களுக்கு ஏற்படும் அச்சமும், மயான அமைதியும் பயங்கரமானவை.

******

புரட்சிக்கான எதிர்வினைகளின் பட்டியல்

எதிர் நடவடிக்கை பற்றிய கதையை எங்கிருந்து ஆரம்பிப்பது? எரியும் மெழுகுவர்த்தியிலிருந்து ஆரம்பிப்பதா அல்லது அந்த ஒளியை அணைக்கும் குப்பியை வைத்து ஆரம்பிப்பதா? கனவுகளிலிருந்து ஆரம்பிக்கவா அல்லது கனவுகள் முடியும் மரணத்திலிருந்து ஆரம்பிப்பதா? பச்சை பசும் காட்டிலிருந்து ஆரம்பிக்கவா அல்லது உருகி, பின் உறைந்து நிற்கும் கடும் இரும்புத் தூணிலிருந்து ஆரம்பிக்கவா?

******

கொலைகளுக்கு வரம்பு ஏதுமில்லை. ஆணோ பெண்ணோ குழந்தைகளோ, கண்ணில் பட்ட அனைவரும் கொல்லப்பட்டனர். பெண்களின் நிலை இன்னும் மோசம். கொடூரமான பாலியல் பலாத்காரங்கள் கணக்கிலடங்காதவை. இதற்கான எதிர்வினையாக பல ஜுதும் தலைவர்கள் மாவோயிஸ்டுகளால் குறி வைக்கப்பட்டனர்

                                    *******

போர் மேகங்கள் எங்கும் கறுத்து இருண்டு பரவியிருந்தன. சாலைகள், காடுகள், பள்ளிகள், மின்சார மின்மாறிகள், தண்ணீர்க் குழாய்கள் என்று அனைத்தும் ஒட்டுமொத்தாக நிர்மூலமாக்கப்பட்டன.  அரசு காடுகளை அழித்து சாலைகளை நிறுவியது. ஆனால், மாவோயிஸ்டுகள் இரவுகளில் கிராமத்து மக்களை வைத்துப் புதிதாகப் போடப்பட்ட சாலைகளின் குறுக்கே பள்ளங்கள் தோண்டி அவற்றைப் பயன்படுத்தமுடியாத நிலைக்குக் கொண்டுசென்றனர்.

                                                                                   

 ******

*

1018. பற்றியெரியும் பஸ்தர் -- இந்நூலிலிருந்து சில பகுதிகள் ... 1

*

தான் கைது செய்த படிப்பறிவில்லா இளைஞர் ஒருவரிடம் காவல் துறை அதிகாரி ஒருவர் அவரைச் சீண்டும் வண்ணமாக, ‘நக்சல்பாரிகள் வியட்நாமைப் பற்றி அதிகமாகப் பேசித் திரிகிறீர்களே... அந்த வியட்நாம் நாடு எங்கே இருக்கிறது என்று பார்த்துச் சொல்... பார்ப்போம்’ என்று உலக வரைபடத்தை விரித்திருக்கிறார். அந்த இளைஞரோ வெகு அமைதியாக, தன் கரத்தை நெஞ்சில் வைத்து, ஆணித்தரமாக, ‘அது என் இதயத்தில் இருக்கிறது’ என்றாராம்.

முன்பு பிரிவுகள் ஏற்படாத மாவட்டமான பஸ்தார் 39,114 சதுர கிலோ மீட்டர் அளவில் சத்தீஸ்கரின் தென் பகுதியில் விரிந்து கிடந்தது. வரைபடத்தில் கிழிந்த ஒரு பகுதி காற்றில் அல்லல்பட்டு அலைவது போல் கொடுமைகளுக்கும் பல தடங்கல்களுக்கும் நடுவில் அதன் மையப் பகுதி தடுமாறிக் கொண்டிருக்கிறது. இந்தப் பகுதிதான் இந்திய அரசு மாவோயிஸ்ட் கெரில்லாக்களின்மீது எழுப்பியுள்ள பெரும் போரின் மையப் புள்ளி. கம்பி வைத்த முள் வேலிகளும், மேலே பறந்து திரியும் ஹெலிகாப்டர்களும், இங்கிருக்கும் காட்டுப் பகுதிகளைப் பிளந்துகொண்டு செல்லும் நீண்ட நெடுஞ்சாலைகளும், சுரங்கத் தோண்டல்களும் இப்போரில் இந்த அரசு கட்டி எழுப்பியுள்ளவை. ஆனால், இந்திய கம்யூனிஸ்ட் கட்சி (மாவோயிஸ்ட்) அமைத்த ‘மக்கள் அரசு’ வரையறை செய்யப்படாத எல்லைகளையும், ரகசியமான தகவல்களையும் கைவசம் வைத்திருந்தது. இந்த ‘இரண்டாம் அரசின்’ குடிமக்கள் நிச்சயமில்லாத, ஆபத்துகள் மிகுந்த பாதையைத்தான் தேர்ந்தெடுத்திருந்தனர். அந்தப் பயணத்தின் முடிவு ஒரு நிச்சயமான இறுதிப் புள்ளி அல்ல; ஆனாலும் அந்தப் பயணம் மிகுந்த மன உறுதியோடு மேற்கொள்ளப்பட்டது.

இந்திய அரசு எந்தத் தடையுமில்லாத அரக்கத்தனத்தோடு போரிடுவதை எதிர்ப்பவர்களுக்காகவும், மாவோயிஸ்டுகளின் தியாகத்துக்கு மரியாதை கொடுக்கும் அதே சமயம் அவர்கள் தேர்ந்தெடுத்துள்ள பாதையோடு உடன்பட மறுப்பவர்களுக்காகவும் இந்நூல் எழுதப்பட்டுள்ளது. தீவிரவாதத்தை அடக்க தீவிரவாதத்தை அவிழ்த்துவிடுவதன் மூலம் ஊழலும், முரட்டு மிருகத்தனமும் மட்டுமே சமூகத்தில் வளரும் என்ற கருத்தோடு இருப்பவர்களுக்காகவும் இது எழுதப்பட்டுள்ளது.

*

1017. பற்றியெரியும் பஸ்தர் -- சத்தீஸ்கர் மாநிலம் பற்றிய சில குறிப்புகள்.

*

 சத்தீஸ்கர் மாநிலம் பற்றிய சில குறிப்புகள்.

இந்தியாவில் சத்தீஸ்கர்

சத்தீஸ்கர் மாவட்டம்

Bastar district

District in Chhattisgarh

Description

Bastar District is a district of the state of Chhattisgarh in central India. Jagdalpur is the district headquarters. The district has an area of 10755.79 km². 

Area: 10,470 km²

Tehsil: 4

மத்திய பிரதேசத்திலிருந்து பிரிந்த மாநிலம் சத்தீஸ்கர். காங்கிரஸ், பாஜக பிரதானக் கட்சிகள். பாஜகவின் கோட்டைகளில் இம்மாநிலமும் ஒன்று. பாஜக முதல்வர் ரமண் சிங் தொடர்ந்து மூன்று முறை வென்று ஆட்சியில் இருக்கிறார். மொத்தம் உள்ள 90 இடங்களில், பாஜக 49 இடங்கள், காங்கிரஸ் 39 இடங்களைக் கடந்த சட்ட மன்றத்தில் கையில் வைத்திருந்தன.

மாநிலப் பின்னணி: பரப்பளவு 1,35,192 ச.கி.மீ. மக்கள்தொகை 2.56 கோடி. பரப்பளவில் நாட்டில் 10-வது இடம். மக்கள்தொகையில் 17-வது இடம். வட மேற்கில் மத்திய பிரதேசமும், மேற்கில் மஹாராஷ்டிரமும், தெற்கில் ஆந்திரமும், கிழக்கில் ஒடிஷாவும், வட கிழக்கில் ஜார்க்கண்டும் இதன் எல்லைகள். ஜிடிபி ரூ.3.26 லட்சம் கோடி. வளர்ச்சிவீதம் 6.7%. எழுத்தறிவு 70%. ஆட்சிமொழி இந்தி. 27 மாவட்டங்கள். சட்ட மன்றத் தொகுதிகள் 90. மக்களவைத் தொகுதிகள் 10. இந்துக்கள் 97%. மக்கள்தொகையில் 34% பழங்குடிகள்.

பொருளாதாரம்: கனிம வளங்கள் நிறைந்த சத்தீஸ்கரில் சுரங்கத் தொழில் பிரதானம். பெரு நிறுவனங்களின் வேட்டைக்காடு என்ற பெயரும் உண்டு. நாட்டின் உருக்கு உற்பத்தியில் 15% இங்குதான். ஆண்டுக்கு 54 லட்சம் டன் உருக்கும், 6 லட்சம் டன் அலுமினியமும் உற்பத்தியாகின்றன. நாட்டின் சிமென்ட் உற்பத்தியில் 20% பங்களிப்பு இம்மாநிலத்துடையது. நிலக்கரி வளம் கணக்கிலடங்காதது. இரும்பு, சுண்ணாம்புக்கல், டோலமைட், பாக்ஸைட், வைரம் என்றெல்லாம் இங்கிருந்து கனிமங்கள் உலகம் முழுக்க அனுப்பப்பட்டாலும் ஏழ்மை பீடித்திருக்கும் மாநிலம். 57.88 லட்சம் ஹெக்டேரில் ஒருபோக சாகுபடிதான். சுமார் 70,000 ஹெக்டேரில் மட்டும் இருபோக சாகுபடி. நெல், சோளம், பருப்பு வகைகள், சிறுதானியங்கள், நிலக்கடலை, சோயாபீன்ஸ், சூரியகாந்தி முக்கிய சாகுபடி. விவசாயத்தையே 80% மக்கள் சார்ந்திருக்கிறார்கள்.

கிராமம் - நகரம்:  தலைநகரம் ராய்ப்பூர். பிலாய், கோர்பா, பிலாஸ்பூர் உள்ளிட்ட முக்கிய நகரங்கள் உண்டு. மகாநதியின் படுகைப் பிரதேசம். சோன் நதியின் உபநதியான ரிஹந்த், இந்திராவதி, ஜோக், அர்பா, ஷிவ்நாத் ஆகிய ஆறுகள் பாய்கின்றன. மத்தியப் பகுதியில் உள்ள ராய்ப்பூர் – பிலாய் – துர்க் நகரங்கள் தொழில்மயமாகியிருக்கின்றன என்றாலும், தென்பகுதியில் வறுமை நிலவுகிறது. 45% மேற்பட்ட நிலப்பரப்பு வனப்பகுதி. நகர்மயமாதல் விஷயத்தில் பின்தங்கிய மாநிலம். வறுமையும் வேலைவாய்ப்பின்மையும் வசதிக் குறைவும் சேர்ந்து மாவோயிஸ்ட்டுகளை செல்வாக்கு பெற வைத்திருக்கின்றன. மாநிலத்தின் பல வனப்பகுதிகள் அவர்களுடைய ஆதிக்கத்தின் கீழ் இருக்கின்றன.

பேசுபொருள்:  காங்கிரஸிலிருந்து பிரிந்துசென்ற முன்னாள் முதல்வர் அஜீத் ஜோகியின் சத்தீஸ்கர் ஜனதா காங்கிரஸ் கட்சி மாயாவதியின் பகுஜன் சமாஜுடன் கூட்டணி அமைத்துப் போட்டியிடுவது மூன்றாவது சக்தியாகிறது. ரமண் சிங் ஆட்சியில் தொடர்ந்து தொடரும் பாஜக ஆட்சியில் வேலைவாய்ப்புகள் பெருகவில்லை. மாநிலத்தில் ஜனநாயக சூழல் இல்லை. ஊழல் மலிந்த ஆட்சி ஆகியவற்றை காங்கிரஸ் பேசியது. பாஜகவோ மாநிலத்தில் ஆற்றியிருக்கும் பணிகளையும் மாவோயிஸ்ட்டுகள் ஒடுக்கப்பட்டிருப்பதையும் சுட்டிக்காட்டிப் பேசியது. மூன்றாவது சக்தியாக உருவெடுத்திருக்கும் அஜீத் ஜோகி ஜெயிக்கிறாரோ இல்லையோ காங்கிரஸை காலிசெய்யும் வகையில் பேசினார்.

===

2018 தேர்தல் முடிவுகள்

மூன்று முறையாக தொடர்ந்து ஆட்சியமைத்த ரமன் சிங்கிற்கு இம்முறை ஆட்சியமைக்கும் வாய்ப்பு இல்லை.

90 தொகுதிகளை கொண்ட சட்டப்பேரவை தேர்தலில் பாஜக வென்றது 15 இடங்கள் மட்டுமே. ஜனதா காங்கிரஸ் ஐந்து இடங்களையும் பகுஜன் சமாஜ் இரண்டு இடங்களையும் வென்றுள்ளன. காங்கிரஸ் 67 இடங்களில் வென்றுள்ளது. ஒரு இடத்தில் முன்னிலை வகிக்கிறது.

சத்தீஸ்கரில் காங்கிரசுக்கு 43% வாக்குகளும் பாஜகவுக்கு 33% வாக்குகளும் ஜனதா காங்கிரசுக்கு 7.6% வாக்குகளும் பகுஜன் சமாஜ் கட்சிக்கு 3.9% வாக்குகளும் கிடைத்துள்ளன.

*