465. எந்த மதக்காரனாக இருந்தால் என்ன ...

*

சமுதாய நலனுக்காக தொடர்ந்து PLURAL INDIA என்ற தன் வலைப்பூவில் எழுதி வரும் பேரா. ராம் புனியானி (Ram Puniyani)எழுதிய கட்டுரை ஒன்றின் சில பகுதிகள் தமிழில் …

நியாயமான ஒரு கேள்வியைக் கேட்பது

நிச்சயமாக நாட்டுக்குத் தீங்கில்லை.

26/11 அன்று நடந்த மும்பைத் தீவிரவாதத்தின் பெருங் கொடுமைகளில் மலேகாவுன் வெடிகுண்டு வெடிப்பைத் துப்பு துலக்கி வந்த நம் காவல்துறையின் ஹேமந்த் கர்காரே உயிரிழந்ததும் ஒரு பெரிய சோகம். அவருக்கு ஏற்கெனவே பல அச்சுறுத்தல்கள் தொடர்ந்து வந்துள்ளன. இதற்கு மகாராஷ்ட்ர அரசிடம் தேவையான சான்றுகளும் உண்டு. இந்த அதிகாரியின் மரணத்தைப் பற்றிப் பேசுபவர்கள் இந்து மதத்தின் எதிரிகள் அல்லது பாகிஸ்தானின் ஆதரவார்கள் என்பது போன்ற தோற்றத்தை ஏற்படுத்த பலரும் முயலுவதுண்டு. நடந்த பலவற்றை மறைக்கவே இந்த முயற்சி.

தான் கொல்லப்படுவதற்கு முந்திய நாள் கர்காரே தன்னுடன் பேசியதாக காங்கிரஸ் பொதுச்செயலர் திக்விஜய் சிங் கூறியுள்ளார். அன்று இந்துத்துவவாதிகள் தன்னை மிகவும் நெருக்கி வருவதாக கார்கரே  கூறியுள்ளார். இதை மறைக்க சிவசேனாவும் பி.ஜே.பி.யும் பெரும் முயற்சிகள் எடுக்கின்றன. இந்த அதிகாரியின் மேல் பல குற்றச்சாட்டுகளைச் சொல்லி வருகின்றனர். நரேந்திர மோதி கர்காரேயை ஒரு தேசத்துரோகி என்றும் குற்றம் சாட்டினார். அதன்பின் அவர் அளித்த ஒரு கோடி ரூபாயை வாங்கிக்கொள்ள கர்காரேயின் மனைவி மறுத்து விட்டார்.

இச்சூழலில் கர்காரே தனது மதிப்புக்குரிய பழைய காவல் அதிகாரி ஜூலியோ ரெட்பேரோவை நேரடியாகச் சந்தித்துப் பேசியுள்ளார். அத்வானி – மோடி கொடுத்துவரும் தொல்லைகளைப் பற்றி அவரிடம் பேசியுள்ளார். ரெய்பேரோ, “தன்னைப் புரிந்து கொள்ளும் ஒருவர் வேண்டும் என்ற ஆதங்கத்தோடுதான் கர்காரே என்னிடம் வந்தார்” என்று சொல்லியுள்ளார். வேண்டுமென்றே தான் ப்ரக்யா சிங் தாக்கூரின் மீது பழி போடுவதாக பி.ஜே.பி. முனைந்து செயல்பட்டு வந்துள்ளதாக கர்காரே வருத்தப்பட்டுள்ளார் என்றும் ரெய்பேரோ சொல்லியுள்ளார்.

இப்போது தாக்கூருக்கும், சங் பரிவாருக்கும்,அதன் தலைவர்களான இந்த்ரேஷ் குமார், ஸ்வாமி அசிமாநந்தா இவர்களுக்கும் ஆஜ்மீர் மெக்கா மஜீத்தின் வெடிகுண்டு வெடிப்புக்கும் உள்ள தொடர்புகள் வெளிவர ஆரம்பித்துள்ளன. ஆனால், எந்த வெடிகுண்டு வெடிப்புகளை ஒட்டியும் அவை ஜெகாதி குழுக்களால் நடத்தப்பட்டவைகள் என்ற தலைப்புச் செய்திகள்தான் நமது ஊடகங்களில் மிகவும் பிரபலம். மும்பைத் தாக்குதல் அல்-கொய்தாவின் மூலம என்பது உண்மையாக இருப்பினும், மற்ற பல வெடிகுண்டு நிகழ்வுகளில் தாக்கூர், இந்த்ரேஷ் குமார், ஸ்வாமி அசிமாநந்தா போன்றோர் நம் தேசிய ராணுவத்திலிருந்த Lt. Colonel ப்ரசாத் ஸ்ரீகாந்த் புரோஹித் போன்றோருடன் செய்த சதிகள் என்பதும் தெரிய வருகின்றன. ஆனாலும் திக் விஜய் சிங், அந்துலே போன்றோர் இவைகளைக் கோடிட்டு காட்டிய பின்னும் காங்கிரசும் இன்னும் இதை நம்பத் தயாராக இல்லை.

இன்றைய தேவை முழுமையான, தீவிரமான புலன்விசாரணகளும் எம்மதத்தாராக இருந்தாலும் குற்றம் புரிந்தோருக்கான சரியான தண்டனைகளும்தான். இதனைக் கேள்வி கேட்போரெல்லாம் பாக்கிஸ்தானிய ஆதரவாளர்கள் என்ற குற்றச்சாட்டு பொருளற்றது.

இக்குற்றங்களைச் செய்தவர்களை எதிர்ப்போரெல்லாம் இந்து மதத்திற்கு எதிரிகள் என்பது உண்மைக்குற்றவாளிகளை மறைக்கத்தான் பயன்படுமேயொழிய வேறு பயனில்லை. குற்றம் செய்தவர்களைப் பற்றிப்பேசும் போது அவர்கள் சார்ந்துள்ள மதங்களைப் பார்க்க வேண்டியதில்லை.

---------------------------------------

என்ன பெரிய மாற்றம் நம் நாட்டில் வந்துவிடப் போகிறது. 
இருந்தாலும் ....

வரும் புத்தாண்டு இனியதாக எல்லோருக்கும் இருக்க என் வாழ்த்துக்கள்.