580. அவாளுக்கு மட்டும் ! – ஒரு தொடர்கதை !!

*


நம் ப்ளாக்குகளின் தொகுப்பைப் பார்க்கும் பட்டியல் ஒன்று இப்போது புதிதாக வந்துள்ளது. View count இதில் புதிய ஒரு சேர்க்கை. ஆறு ஏழு வருஷமா பதிவுகள் எழுதினாலும் அவ்வப்போது எத்தனை பேர் நம்ம பதிவைப் பார்த்திருக்காங்கன்னு தெரிஞ்சுக்கிறதுல இருக்கிற சந்தோஷம் இன்னும் விடலை. தொடர்கதையாகத்தானிருக்கு !!

அதிலும் கடைசியா இப்போ அந்த View count-களைப் பார்க்கும்போது ஒரு விஷயம் கொஞ்சம் ஆச்சரியாக இருந்தது. வழக்கமாக என் பதிவுகளில் உள்ள இஸ்லாமியப் பதிவுகளுக்கு ‘கூட்டம்’ வரும் என்பது தெரியும். சரி .. நம்ம ’விஷய ஞான’த்தைத் தேடி கூட்டமா வர்ராங்கன்னு நினச்சிக்கிட்டு இருந்தேன். ஆனால் ’அவாளுக்கு மட்டும்’ அப்டின்னு ஒரு பதிவு போட்டேன். View count பிச்சுக்கிட்டு போகுது ! ஏன்னு தெரியலை! நீங்களே பாருங்களேன் ...

5.5.12 - இஸ்லாமிய குரான்? ஏன் இன்னும் இச்செய்தி பரவவில்லை..923 (பின்னூட்டங்கள் 20)
5.6.12 - இஸ்லாமிய குரான்? ஏன் இன்னும் இச்செய்தி பரவவில்லை...1192 (பின்னூட்டங்கள் 27)

சரி .. நம்ம நினச்சதை விடவும் ’இந்தச் செய்தி நல்லாவே பரவியிருக்குன்னு’ நினச்சு, சந்தோஷப்பட்டுக்கிட்டேன். (இஸ்லாமியர் யாரும் அப்பதிவைப் படிக்கவேயில்லை என்று தெரிந்தாலும் சந்தோஷப்பட்டுக் கொண்டேன்!!) ஆனால் அதற்குப் பிறகு இன்னொரு பதிவு போட்டேன்.

6/22/12 - அவாளுக்கு’ மட்டும் ! 1240. (பின்னூட்டங்கள் 48) என்ன ஆச்சரியம் ..

இந்தப் பதிவு நிறைய மக்களால் படிக்கப்பட்டிருக்கிறது! இதில் எனக்கே ஒரு சின்ன வருத்தம். ஏன்னா நான் ஒன்று நினைத்து எழுதினேன்.

//.’அவாளுக்கே’ இந்த மாதிரி நிகழ்ச்சி நடத்துறது பிடிக்குமோ இல்லையோன்னு நேக்கு ஒரு சந்தேகம் எப்போதும் உண்டு. . இருந்தும் ஆளாளுக்கு இப்படி நடத்துறாளே .. ஏன்? யாருக்காக இப்படில்லாம் பண்றா? இப்படிப் பண்றவா எல்லோரும் அவாளும் கிடையாதுன்னு நான் நினச்சுண்டு இருக்கேன். பின் ஏன் இப்டி பண்றா...?//

1. இந்த மாதிரி ஜாதியை ஒட்டி நிகழ்ச்சி நடத்துவது தேவையில்லாதது.
2. இது போன்ற ‘ஜாதி நிகழ்ச்சி’யை நடத்துவது பொதுவாக அந்த   
               ஜாதிக்காரர்களாகக் கூட இருப்பதில்லை.
3. இப்படி நடக்கும் நிகழ்ச்சிகளை அந்த ஜாதி மக்களே விரும்ப மாட்டார்கள்.
4. இருந்தும் இப்படி நடத்த வேண்டியது ஏன்?
5. Viewership / TRP இதனாலெல்லாமா கூடி விடும்?

பழைய தமிழ் சினிமாக்களைப் பார்த்தால் சில ஜாதிப் பெயர்கள் மட்டும் வரும் – செட்டியார், பிள்ளை, ஐயர் ..இப்படி. அந்தக் காலத்தில் அது இருந்தது; ஒழிந்து போகட்டும். இப்போது பலரும் தங்கள் பெயருக்குப் பின்னால் ஜாதியை இணைப்பதில்லை என்ற அளவிலாவது “முன்னேறியிருக்கிறோம்”! இன்னும் ஏனிந்தக் கருத்துக்களை மக்கள் தூக்கிச் சுமக்க வேண்டும் என்ற கேள்வி எழுந்ததால் இப்பதிவை இட்டேன்.

இதில் எனக்கு ஒரு ஏமாற்றம். முதலில் டோண்டு எனக்கு நன்றி சொல்லி ஒரு பதிவிட்டார்.  அதில் அவருக்கு இந்த நிகழ்ச்சி மிக்க மகிழ்ச்சி கொடுத்ததாகச் சொன்னார். அதோடு அவர் சொன்ன ஒரு முக்கியமான விஷயம்:

//பார்ப்பன வெறுப்பளர்களுக்கு நம்மை மாதிரி சிலர் வந்து பதிலடி கொடுப்பது அவசியம்.// 

இந்த நிகழ்ச்சி பார்ப்பனர்களைத் தூக்கிப் பிடிப்பதாக அவர் நினைத்துக் கொண்டார். எனக்கு அப்படித் தெரியவில்லை. எந்த ஜாதியாக இருந்தாலும், ஏன் ஜாதியை வைத்து ஒரு நிகழ்ச்சி என்று தான் நினைத்தேன். ஆனால் அதற்குள் Tamil அப்டின்னு ஒருத்தர் வந்து கொக்கரித்து விட்டார். இருவருமே நான் சொன்னதின் மையப்புள்ளியைக் கவனிக்க மறந்து விட்டார்கள்.

(டோண்டுவின் பதிவில் சில பதில்கள் சொல்லியிருக்கலாம். தேவையில்லை; அவர்கள் இருவரும் சந்தோஷமாகவே இருக்கட்டுமே என்று விட்டு விட்டேன்! )









*