468. சுவனப்பிரியனும் நானும் ...

*

”என்னைக் கவர்ந்த திருமணங்கள்!” என்ற தலைப்பில் திரு. சுவனப்பிரியன் பதிவு ஒன்று இட்டிருந்தார்.
அவர் உறவுத் திருமணங்கள் பற்றி எழுதிவிட்டு, அதில் //என் வீடு, என் தெரு, என் ஜாதி, என் ஊர் என்ற குறுகிய எண்ணங்களை எல்லாம் விட்டு விட்டு 'யாதும் ஊரே யாவரும் கேளீர்' என்ற கணியன் பூங்குன்றனாரின் பழமொழிக் கேற்ப வாழ முற்பட்டிருக்கும் இந்த ஜோடிகளை நாமும் வாழ்த்துவோம்.// என்று எழுதியுள்ளார்.

அவர் மகிழ்ச்சியோடு நானும் கலந்து கொள்கிறேன். மணமக்களுக்கு என் அன்பான வாழ்த்துகள்.

இப்பதிவில் நானொரு பின்னூட்டம் இட்டிருந்தேன்.

//என் வீடு, என் தெரு, என் ஜாதி, என் ஊர் என்ற குறுகிய எண்ணங்களை எல்லாம் விட்டு 'யாதும் ஊரே யாவரும் கேளீர்' என்ற கணியன் பூங்குன்றனாரின் ...//

இதில் ஒரு சின்ன மாற்றம்: என் வீடு, என் தெரு, என் ஜாதி, என் மதம், என் ஊர் என்ற குறுகிய எண்ணங்களை எல்லாம் விட்டு 'யாதும் ஊரே யாவரும் கேளிர்' என்ற கணியன் பூங்குன்றனாரின் ...//  என்பது என் பின்னூட்டம்.

இதற்குப் பதிலாக சுவனப்பிரியன் ஒரு பின்னூட்டம் இட்டிருந்தார்:

//உங்கள் வாதத்தை ஒத்துக் கொள்கிறேன். நீங்கள் சொல்வது போல் இஸ்லாம் ஒரு மதமே அல்ல. அது ஒரு வாழ்க்கை நெறி. இனம், மொழி, நாடு கடந்து இந்த வாழ்க்கை நெறியைக் கடை பிடிக்கும் அனைவரும் முஸ்லிம்களே! நீங்கள் நாத்திகராக இருந்தாலும் உங்களுக்கென்று சில வாழ்க்கை நெறி முறைகளை வகுத்து வைத்திருக்கிறீர்கள். அதே போல் முஸ்லிம்களும் தங்களுக்கென்று சில வழக்கங்களைக் கொண்டிருக்கிறார்கள். ஒரு வித்தியாசம் அந்த சட்ட திட்டங்களெல்லாம் இறைவனிடமிருந்து வந்ததாக முஸ்லிம்களின் நம்பிக்கை. இந்த நம்பிக்கை உலகளாவிய அளவில் பரந்திருப்பதால்தான் ஒரே குடும்பத்தில் இந்தியாவும், பாகிஸ்தானும், எகிப்தும் சங்கமிக்க முடிந்தது.

நம் நாட்டிலோ ஒரே மதத்தில் அதன் உட்பிரிவுகளில் பழக்க வழக்கங்களில் ஏக வித்தியாசத்தைப் பார்க்க முடிகிறது. சாதிகளுக்குள் இருக்கும் ஏற்றத் தாழ்வுகளும் உறவுகள் மலர்வதற்கு தடையாக இருக்கின்றன.

வருகைக்கும் கருத்துக்கும் நன்றி.!//

இதற்கு நான் ...

//இந்த வாழ்க்கை நெறியைக் கடை பிடிக்கும் அனைவரும் முஸ்லிம்களே! //

இது நீங்கள் சொல்வது. இந்து மதம் ஒரு வாழ்க்கை நெறி என்கிறார்கள் அவர்கள்.

//இந்த நம்பிக்கை உலகளாவிய அளவில் பரந்திருப்பதால்தான்...//

இது போல் வேறு சில மதங்களும் அவர்கள் நம்பிக்கைகளும் உலகில் பரந்து கிடக்கின்றனவே!

//இஸ்லாம் ஒரு மதமே அல்ல. //
சுரா: 47.4 - 6... இதில் இறை நிராகரிப்பவர்களை என்ன செய்யச் சொல்லியுள்ளது? (இது ஒரு war cry என்று சொல்ல வேண்டாம்.) கடவுளின் வார்த்தைகள் இடத்திற்கும் காலத்திற்கும் மாறுபட்ட பொருளைத் தரக் கூடாதல்லவா?
அதோடு ... அப்படிக் கொல்பவர்களை ‘சுவனத்தில் அவர்களை நுழைவிப்பான்’ என்பதுவும், முகமதுவின் வார்த்தைகளான, “Two religions shall not remain together in the peninsula of the Arabs' என்பதும் நீங்கள் சொல்லும் வாதத்தை (ஒரே குடும்பத்தில் இந்தியாவும், பாகிஸ்தானும், எகிப்தும் சங்கமிக்க முடிந்தது.) எனபதை முறியடிக்கின்றனவே ...

உலக அளவில் மக்கள் நம்மைப் பிரிப்பவைகளே race & மதங்கள்தானே... சாதிகள் நம்ம ஊர் சரக்கு - extra load!!//

இதற்கு சுவனப்பிரியன் ...

//இது நீங்கள் சொல்வது. இந்து மதம் ஒரு வாழ்க்கை நெறி என்கிறார்கள் அவர்கள். //

இந்து மதம் வர்ணாசிரமத்தில் கட்டப்பட்டது. உலக மக்கள் அனைவரும் ஒரு தாய் தந்தையரிலிருந்து பிறந்தவர்கள் என்று கூறும் இஸ்லாத்தோடு எப்படி ஒப்பிடுகிறீர்கள்.

//இது போல் வேறு சில மதங்களும் அவர்கள் நம்பிக்கைகளும் உலகில் பரந்து கிடக்கின்றனவே!//

அந்த மக்களால் எந்த அளவு அந்த மதங்கள் பின்பற்றப்படுகிறது என்பதையும் நாம் பார்க்க வேண்டும். அமெரிக்காவிலும் இன்னபிற ஐரோப்பிய நாடுகளிலும் கிறித்தவ மதம் பெயரளவுக்குத்தான் உள்ளது. அந்த மக்களின் வாழ்க்கையில் எந்த ஒரு தாக்கத்தையும் ஏற்ப்படுத்தவில்லை. அதிகம் நாத்திகர்களைத்தான் உருவாக்கியிருக்கிறது. உங்களையும் சேர்த்து.

//சுரா: 47.4 - 6... இதில் இறை நிராகரிப்பவர்களை என்ன செய்யச் சொல்லியுள்ளது? (இது ஒரு war cry என்று சொல்ல வேண்டாம்.) கடவுளின் வார்த்தைகள் இடத்திற்கும் காலத்திற்கும் மாறுபட்ட பொருளைத் தரக் கூடாதல்லவா? அதோடு ... அப்படிக் கொல்பவர்களை ‘சுவனத்தில் அவர்களை நுழைவிப்பான்’ என்பதுவும்,//

முகமது நபியையும் அவரின் தோழர்களின் வீடு வாசல் சொத்து சுகங்கள் அனைத்தையும் பறி கொடுத்து மக்காவை விட்டு வெளியேற்றப்பட்டனர். மதீனா வந்து தனி அரசையும் உருவாக்கினர். இதன் பிறகும் மக்காவாசிகள முஸ்லிம்களை அழிக்கும் முகமாக படையெடுத்து வந்ததால் போர் செய்ய குர்ஆன் கட்டளை இடுகிறது. தன்னை அழிக்க வருபவர்களிடமிருந்து தற்காத்து கொள்வது தவறா? நம் நாட்டோடு பாகிஸ்தான் போருக்கு வந்தால் நம் நாட்டு வீரர்களுக்கு எதை உபதேசிப்போமோ அதைத்தானே குர்ஆனும் செய்கிறது. இதில் தவறு எங்கிருந்து வருகிறது.

'முகம்மதே! போர்க்களத்தில் எதிரிகள் சமாதானத்தை நோக்கி சாய்ந்தால் நீரும் அதை நோக்கி சாய்வீராக!'- குரஆன் 8:61

//முகமதுவின் வார்த்தைகளான, “Two religions shall not remain together in the peninsula of the Arabs' என்பதும் நீங்கள் சொல்லும் வாதத்தை (ஒரே குடும்பத்தில் இந்தியாவும், பாகிஸ்தானும், எகிப்தும் சங்கமிக்க முடிந்தது.) எனபதை முறியடிக்கின்றனவே ...//

ஆம். இஸ்லாம் என்ற ஒரே வாழ்க்கை நெறியில் அவர்களை சங்கமிக்க வைத்ததைத்தான் சுட்டிக்காட்டியுள்ளேன்.//

இதற்குரிய பின்னூட்டத்தை வலையேற்ற முயற்சித்து முடியாததால் அதனை இங்கே பதிவாக இட்டுள்ளேன்.

நான் கொடுத்துள்ள பதில்:

//மதம் ஒரு வாழ்க்கை நெறி// - இப்படி சொல்லுங்கள்; ஒப்புக் கொள்கிறேன். எந்த தத்துவத்தில் பிறந்திருந்தாலும் எந்த மதமும் ஒரு சரியான நெறி முறையைப் பற்றித்தான் பேசும். நல்லவனாக இரு என்பதே எந்த மதத்தின் அடிப்படை நாதமாக இருக்கும். இதில் உன்னுடையது சிறந்ததல்ல என்னுடையதே சிறந்தது என்ற கோஷம் வரும்போதுதான் வருகின்றன பிரச்சனைகள்.

இந்து மதத்தில் வர்ணாசிரமம் ஒரு பகுதி. அதுதான் இந்து மதம் என்பது தவறு.

//தாய் தந்தையரிலிருந்து பிறந்தவர்கள் என்று கூறும் இஸ்லாத்தோடு ..//  -  மற்ற இரு ஆபிரஹாமிய மதங்கள் என்ன சொல்கின்றன? (அவர்களை நீங்கள் திம்மிகளாகச் சொல்கிறீர்கள் என்று நினைக்கிறேன்.)  பொதுவாகவே, கடவுள் மனிதனைப் படைத்தார் என்றுதான் எல்லா மதங்களும் சொல்கின்றன. இதில் தனித்துவம் எம்மதமும் கொண்டாட முடியாது. ஆபிரஹாமிய மதம் அவங்களுக்கு பெயரெல்லாம் வைத்திருப்பதாலேயே அது மட்டும் ஒரிஜினல என்று சொல்ல முடியாது.

//எந்த அளவு அந்த மதங்கள் பின்பற்றப்படுகிறது என்பதையும் நாம் பார்க்க வேண்டும். //  -  கட்டாயமாக. அதோடு ஏன் என்றும் யோசிக்க வேண்டும். இஸ்லாமில் உள்ள இறுக்கம் இதற்கான காரணம். பாகிஸ்தானில்  தஸீர் நிலைமையைப் பார்த்தீர்கள் அல்லவா? நான் ஒரு கிறித்துவ நாட்டில் இருந்திருந்தாலும் அந்தக் கடவுளை என்னால் புறக்கணிக்க முடியும். ஒரு இஸ்லாமிய நாட்டில் இந்த “சுதந்திரம்” உண்டா? அதை விடுங்க ... தமிழ்நாட்டில், பர்தா வேண்டாம் என்று சில இஸ்லாமியப் பெண்கள் ஒரு தொலைக் காட்சியில் சொல்ல முயன்றதை எதிர்த்து என்னவெல்லாம் சொல்லி வாதிட்டீர்கள்?  இந்த இறுக்கத்தின் காரணம் - சிறு வயதிலிருந்தே சொல்லிப் பயமுறுத்தப்படும் காரணம் - இதுவே உங்கள் கேள்விக்கான பதில். அதோடு மத நம்பிக்கை, இறுக்கம் இந்த இரண்டும் எந்த மனிதனையும் நல்லவனாக வைத்திருக்க முடியாது. (அமினா கதை வாசித்தீர்களா?) தமிழில் ஒரு பழமொழி உண்டு: படிக்கிறது ராமாயணம்; இடிக்கிறது பெருமாள் கோவில்!

//முஸ்லிம்களை அழிக்கும் முகமாக படையெடுத்து வந்ததால் போர் செய்ய குர்ஆன் கட்டளை இடுகிறது.//  --  ஏதோ எதிரிகள் முகமதையும், இஸ்லாமியரையும்  விரட்டி விரட்டி அடித்தது போன்ற ஒரு ‘பாவனையை’ ஏற்படுத்தியுள்ளீர்கள். இரு குழுக்கள் ஒருவரை ஒருவர் மாற்றி மாற்றி வெட்டிக்கொண்டார்கள், வெட்டிக் கொன்றார்கள் என்பதுதான் வரலாறு.  அதோடு, இறை மறுப்பாளர்களை (எதிரிகளை)க் கொன்று குவித்து விடு - இப்படி ஒரு கடவுள் போதித்து ”உக்கிரசாமி”யாவதை விடவும், ’அன்பே சிவம்’ என்பதுவும், ‘உன் வாளை உறையில் போடு; வாளை எடுத்தவன் வாளாலேயே சாவான்’ என்பதுவும், எவ்வுயிரையும் கொல்லாதே என்று சமணத்தில் சொல்வதுவும், வாடிய பயிரைக் கண்டு வாடினேன் என்பதுவும்  ‘நல்லசாமி’களின் நல்ல வார்த்தைகளாக எனக்குத் தோன்றுகின்றன. எங்கேயாவது ஒரு சாமி ‘சண்டை போடு’ என்று சொன்னாலே அது எனக்கு மிக வேடிக்கையாகவும் நகை முரணாகவும் தோன்றுகிறது.

//தன்னை அழிக்க வருபவர்களிடமிருந்து தற்காத்து கொள்வது தவறா?//  -  தவறேயில்லை. ஆனால் அல்லா சொல்லும் வசனம் என்ன? சுரா 47.4 - இறை நிராகரிப்பாளர்களை (எதிரிகளை என்று சொல்லவில்லையே?) நீங்கள் போரில் சந்திக்க நேர்ந்தால் முதல் வேலை கழுத்துக்களை வெட்டுவதுதான்;  ஆனால் ஆங்கிலத்தில் : When you meet the unbelievers, strike off their heads;... என்று உள்ளது. (”நீங்கள் போரில் சந்திக்க நேர்ந்தால்//- இது ஏன் ஆங்கில நூலில் இல்லை? தமிழில் யார், ஏன் சேர்த்தது ??!!)

//இஸ்லாம் என்ற ஒரே வாழ்க்கை நெறியில் அவர்களை சங்கமிக்க வைத்ததைத்தான் சுட்டிக்காட்டியுள்ளேன். // -- புரியவில்லை.

மீண்டும் சொல்கிறேன்: எங்கேயாவது ஒரு சாமி ‘சண்டை போடு’ என்று சொன்னாலே அது எனக்கு மிக வேடிக்கையாகவும் நகை முரணாகவும் தோன்றுகிறது. இப்படியெல்லாம் ஒரு ”எல்லாம் வல்ல நல்ல கடவுள்” “போதிக்கலாமா”? - இக்கேள்விக்கு உங்கள் பதிலை ஆவலோடு எதிர்பார்க்கிறேன்.