1383. விளையாட்டுப் போட்டிகளும் புகார்ப் பொட்டிகளும் ...

*

அகில உலக சண்டியரய்யா

***

விளையாட்டுப் போட்டிகளும்

புகார்ப் பொட்டிகளும் ...

 

FIFA  கால்பந்து உலகக் கோப்பை விளையாட்டுகளை  போன நூற்றாண்டிலிருந்து – 1986ம்  ஆண்டிலிருந்து – பார்த்து வருகிறேன். எந்த ஆண்டிலும் இப்போது போல் பல்வேறு கசப்பான விவாதங்கள் எழுந்ததில்லை. எந்த அணி வெல்லும், யார் யார் நன்கு விளையாடுகிறார்கள் என்பது போன்ற விவாதங்கள் மட்டும் இருக்கும். இந்த முறையோ… கேட்க வேண்டியதில்லை.

முதலில் ரொனால்டோ, மெஸ்ஸி என்ற இருபெரும் கால்பந்து வீரர்களைச் சுற்றி விவாதங்கள் எழுந்தன.  யார் பெரிய வீரர் என்று அந்தக் காலத்து சிவாஜி – எம்.ஜி.ஆர் ரசிகர்கள் மாதிரி சண்டை போட்டுக் கொண்டிருந்தனர். தொலைந்து போகிறது என்று இரு தரப்பினரையும் ரசித்துக் கொண்டிருந்தேன். என்னைப் பொறுத்தவரை இருவரும் பெரிய ஆட்கள் தான்; இருப்பினும் என் நடுமுள் கொஞ்சம் மெஸ்ஸியின் பக்கம் சாய்ந்திருந்தது. என்ன காரணம் என்று யோசித்துப் பார்த்தேன். ரொனால்டோ விளையாட்டை விட அவரது கொனஷ்டைகள் / dramatic manual gestures அதிகமாகத் தோன்றியது. நிறைய Theatrics; மெஸ்ஸியின் dribbling மிகவும் பிடித்தது. அதில் ஓர் அழகுணர்ச்சி இருப்பதாகத் தோன்றியது. அது ஏனோ.. இந்த வீடியோக்காரர்கள் ரொனால்டோ ஒரு ஃப்ரி ஷாட் எடுப்பதற்குள் அவர் மூச்சு வாங்குவது, உதடுகள் துடிப்பது என்று அநியாயத்திற்கு dead close-up வைத்து நம் உயிரை வாங்கி விடுவார்கள். அவரது dribbling-யை விட அவர் உயரே எழும்பி head பண்ணுவது பிடித்தது. பீலே, R9 என்று சுருக்கமாக, செல்லமாக அழைக்கப்பட்ட ப்ரேசில் வீரர் ரொனால்டோ, அவரை விட அவருடன் விளையாடிய ரொனால்டின்கோ, கார்லோஸ், தியரி ஹென்றி(பிரஞ்சு), மரடோனா (அர்ஜென்டினா) போன்ற பிடித்த பல கால்பந்து வீரர்களின் வரிசையில் மெஸ்ஸியை முதலில் வைத்து அடுத்து ரொனால்டோவைச் சேர்ப்பேன். அதன் பிறகு எம்பாப்பே, யாமல் போன்றோர் வரலாம். இன்னும் பலர் உண்டு. காலப்போக்கில் மறக்கும் விஷயங்களில் இதுவுமொன்று,

ஆனால் இந்த ஆண்டு நடக்கும் போட்டியில் பற்பல விஷயங்கள் புதிதாக முளை விட்டிருக்கின்றன. இதில் தலையாய, மிகக் கேவலமான ஒன்று என்னவென்றால் அது நமது ‘அகில உலக சண்டியர்’ ட்ரம்ப் அவர்களின் ஊடுறுவல்தான். பலோகன் என்ற அமெரிக்க வீரர் பாஸ்னியா என்று ஒரு சிறு நாட்டுடன் விளையாடும் போது செய்த தவறுக்காக சிகப்பு அட்டை பெற்றார். நம்ம சண்டியருக்கு அப்படி ஒரு கோவம் தலைக்கேறியது.. உடனே தன் நண்பரான ஜியானி என்ற FIFA தலைவருக்கு ஒரு போனடித்தார். மடித்து கட்டிய வேட்டியை இறக்கி விட்டுக் கொண்டே ஜியானி போனை எடுத்து, ஐயா சொன்ன ஏவலுக்கு உடனே சரியென்று தலையாட்டி விட்டு, அந்த சிகப்பு அட்டையை அரசியல்வாதிகள் தங்கள் உறுதிமொழிகளிலிருந்து எளிதாக வெளியேறுதல் போல் பலோகன்னுக்கு விடுதலை அளித்து விட்டார்.

இந்த இழிசெயலுக்குப் பிறகு அமெரிக்கா தங்கள் அடுத்த ஆட்டத்தில் பெல்ஜியத்தைச் சந்தித்தது. இந்த அணி சிகப்பு அட்டையைத் திரும்பி வாங்குவதற்க்கான தங்கள் எதிர்ப்பைத் தெரிவித்து விளையாடினர். நாங்கள் சின்னப் பசங்களாக விளையாடும் காலத்தில் யாராவது விளையாட்டில் கள்ளத்தனம் செய்தால் அதைக் கள்ள ஆட்டை என்போம். அப்போதெல்லாம் நாங்கள் வழக்கமாக ஒன்று சொல்வதுண்டு: கள்ள ஆட்டைக்கு கடவுள் கரியா காட்டிக் கொடுப்பார். அது அன்று உண்மையிலேயே நடந்தது. அமெரிக்காவிலேயே நடந்த அந்தப் போட்டியில் 4:1 என்ற கணக்கில் பெல்ஜியம் வென்று அமெரிக்காவின் மீது கரி பூசியது. ட்ரம்ப்பிற்கு FIFA ஒரு நோபல் பரிசு ... இல்லையில்லை .. வேறு ஏதோ ஒரு பரிசை இந்த ஆண்டு இறுதியில் கொடுக்கப்போவதாக ஒரு செய்தி காற்றில் கறைந்து வந்துள்ளது.

                        BALOGUN - NO RED CARD

FIFA இதைச் சரிக்கட்ட என்னென்னவோ விவாதங்கள் முன் வைத்தன. ஏற்கெனவே போர்ச்சுகல் ரொனால்டோவிற்கும் இதே போல் சிகப்பு அட்டையை திருப்பி வாங்கியுள்ளோம் என்றது. ஆனால் மக்களிடையே “அந்தப் பப்பு வேகாது” என்றே நான் நினைக்கின்றேன்.

அர்ஜென்டினா அதிக எண்ணிக்கையில் பெனல்டி வாய்ப்புகள் பெறுகின்றன என்றொரு குற்றச்சாட்டு:

இந்த அணி 2022,2026 போட்டிகளில் இதுவரை 8 வாய்ப்புகள் பெற்றுள்ளன. அதற்கு அடுத்ததாக இங்கிலாந்து வெறும் 4 வாய்ப்புகள் மட்டும் பெற்றுள்ளன. இது ஒரு பெரும் சலுகை என்ற குற்றச்சாட்டிற்கு இது பலம் சேர்க்கிறது.

நானே ஒரு முறை பார்த்தேன்.மெஸ்ஸி செய்த பவுலுக்கு எந்தவித தண்டனை கொடுக்காததையும் பார்த்தேன். அர்ஜென்டினாவை FIFA ஒட்டு மொத்தமாக ஆதரிப்பதாகப் பலரும், சிறப்பாக போர்ச்சுகல் ரொனால்டோவின் ஆதரவாளர்கள் தொடர்ந்து குற்றச்சாட்டை FIFA   மேல் வைத்தனர்.

இதோடு முன்பு நடுவர்கள் தங்கள் கண்களை மட்டும் வைத்துக் கடமையாற்றினர். இப்போது டிஜிட்டல், VAR எல்லாம் வந்து விட்டது. ஆனால் சில சமயம் மட்டும் அதைப் பயன்படுத்துகிறார்கள்  போலும்.. முழுவதுமாக அப்பக்கம் நடுவர்கள் செல்வதில்லை.

ஆனால் அர்ஜென்டினாவிற்குச் சிறப்பிடம் கொடுப்பார்கள் என்பதை என்னால் முழுமையாக ஒப்புக் கொள்ள முடிவதில்லை. ஏனெனில் இது நானகைந்து பேர் செய்கிற காரியமல்ல. ஒவ்வொரு போட்டிக்கும் வெவ்வேறு நாட்டிலிருந்து நடுவர்கள் வருகிறார்கள். இவர்கள் அனைவரையும் வகுப்பறை மாதிரி ஒன்றில் வைத்து நாம் எல்லோரும் இணைந்து அர்ஜென்டினாவுக்கு வெற்றியைத் தருவோம் என்றா முடிவெடுக்க முடியும்? எல்லோரும் இணைந்து ஒரு நாட்டிற்கு அனுகூலமாக இருக்க முடியும் என்பது ஒரு non-practicable accusationr. ஆனால் சண்டியர் சொன்னார் என்பதற்காக ஆட்டத்தில் கொடுத்த கார்டை அதன் பிறகு வாபஸ் வாங்குவது அபத்தத்திலும் அபத்தம்; அநியாயத்திலும் அநியாயம். இதொரு தனி மனிதனால், அதாவது, மிகப்பெரும் அமைப்பான FIFAவின் பெருந்தலைவர் ஒருவரால் எடுக்கப்பட்ட முடிவு. இதைத் தனிமனிதத் தவறு என்றும் சொல்லித் தப்பிக்கலாம்.

இது பற்றாது என்பது போல் அர்ஜென்டினா FIFA அமைப்பு முறையற்ற விதமாக அமெரிக்க வணிகச் சந்தையில் முதலீடு செய்துள்ளதாகவும் அதை அமெரிக்க உளவமைப்புகள் ஆய்வு செய்வதாகவும் ஒரு செய்தி கசிய விடப்பட்டது.

இந்தச் சூழ்நிலைகள் எல்லாமே இந்த உலகக் கோப்பை சமயத்தில் மாறி மாறி வெளிவந்து பல்வேறு வதந்திகளை கொழுத்திப் போட்டிருக்கின்றன. முன்பெல்லாம் விளையாட்டுப் போட்டிகள் தீப்பிடித்து எரியும்; இப்போது வதந்திகளும், புகார்களும் தொடர்ந்து முளைத்து வருகின்றன.

இன்னும் என்னவெல்லாம் நடக்கப் போகிறதோ!

 

1382. SF I FRANCE - SPAIN

15.7.26 Wednesday

இரவு 12.20 (அல்லது புதன் கிழமை காலங்கார்த்தாலே .. அதாவது இரவு 12.20)

 

SF I   FRANCE  -  SPAIN

 

செமி பைனல் ஆரம்பிச்சிருச்சு.  பிரான்ஸ் ஸ்பெயின் விளையாடுறாங்க. இதுல பிரான்சு டீம்ல எம்பாப்பே இருக்கிறாரு. அவர் போன வேர்ல்ட் கப்லையே என் மனச ரொம்ப கவர்ந்திட்டார். ஏன்னு கேட்டா அர்ஜென்டினா ரெண்டு கோல் போட்டு முழு வெற்றி அப்படிங்கற மாதிரி இருந்த நிலைமையில் செகண்ட் ஹாஃப்ல பத்து நிமிடங்களுக்குள் ரெண்டு கோல் போட்டு சமன் பண்ணாரு. அந்தப் பத்து நிமிஷம் இருந்த விளையாட்டுல போன தடவை ரொம்பப் பிடிச்சுப் போச்சு.

 

ஸ்பெயின்ல போன வேர்ல்ட் கப்லேயே ஒரு சின்னப் பையனைப் பிடிச்சது. அப்ப அவருக்கு வயசு 19 வயசு. அவர்தான் இப்போ நம்ம சென்னை ஆயாவினுடைய புண்ணியத்துல புதுப் பேரு ஒன்னு வாங்கீருக்காரு - லட்சுமி அம்மாள் அப்படின்னு. லமீன் யமால் (Lamine Yamal) அவரும் விளையாடுகிறார் சோ ரெண்டு டீம்ல ஆளுக்கு ஒரு பிளேயர் பிடிக்கும்னு வச்சிக்குவோமே நமக்கு தான் கருப்பு கலர் கொஞ்சம் பிடிச்சுப் போயிடுமே. அது வேற ஒரு பிரச்சனை நம்மட்ட  இருக்கு. அதனாலே எம்பாப்பே மேலே இன்னும் கொஞ்சம் அபிமனம் அதிகம்.

 

 இப்போ மணி கரெக்டா 12: 20. அந்தக் காலத்துல மாதிரி அலாரம் வச்சு கரெக்ட் டைமுக்கு பார்க்க உட்கார்ந்தேன். நமக்கு வயசுக்கு இதெல்லாம் தேவையில்லை என்றுதான் நினைத்தேன். சரி .. எப்படி போகுதுன்னு பார்ப்போம்

மணி 12.30.  நம்ம செவ்வாய் ராத்திரி என்போம். அவர்கள் புதன்கிழமை காலைங்கிறாங்க. மிகச் சரியாக ஆரம்பிக்கிறார்கள்

 

12.35 பிரான்சிற்கு முதல் கார்னர் கிடைக்கிறது.

 

12.50 லட்சுமி அம்மாள் மேல பவுல் பண்ணதாக ஒரு பெனல்ட்டி ஷாட் கொடுக்கிறாங்க எனக்கு இது சரியா தெரியல. ஏன்னா அந்த ஷாட்டில் ஆப்போனன்ட் லட்சுமி அம்மாவைப் பார்க்காமலே பிரான்ஸ் வீரர் பந்தையடிக்க, அது மிஸ் ஆகி எதிராளியில் காலில் அடித்தது. இதுவும் பாக்ஸ்க்கு வெளியே நடந்தது. இதுக்கு எப்படி பெனல்டின்னு தெரில. போங்கப்பா ... புதுப் புது தத்துவங்களா கொண்டு வர்றீங்க. கிளியர் கோல் விழுந்தது.. அநியாயமான கோலாக எனக்குத் தோன்றியது.

 

1.07 செகண்ட் சான்ஸ் ஸ்பெயினுக்கு. ரொம்ப அழகான சான்ஸ் விட்டுட்டாங்க.

1.12 goal keeper கோலை விட்டு ரொம்ப தூரம் கிரவுண்டுக்குள்ள ஓடி வந்துட்டாரு. நல்ல வேளை. கோல் விழலை.  பிழைச்சாங்க 

1.16 good save by ஸ்பெயின்

1.21 half time

 

எம்பாபேவின் மேஜிக் இந்த ஆட்டத்தில் நடக்கலை. அதோடு ஸ்பெயின் டிபன்ஸ் ரொம்ப ஸ்ட்ராங். தொடர்ந்து மூணாவது கோல் விழாம பிரான்ஸ் தப்பிச்சுது. 2022 ப்ரான்ஸ் உலகக் கோப்பையைத் தூக்கிச் சென்றது. போனதடவை இறுதிவரை வந்து ரன்னராக வந்தது. பாவம் இந்த தடவை அரையிறுதியிலே வாய்ப்பை இழந்தது.

 

நாளை – இங்கிலாந்து – அர்ஜென்டினா. அர்ஜென்டினா வெல்லணும்னு ஆசை, பார்ப்போம். ஆனால் நான் தூக்கம் முழிக்கப் போவதில்லை.

1381. QF – ARGENTINA – SWITZERLAND

*

*

QF – ARGENTINA – SWITZERLAND

அர்ஜென்டினாவின் மெஸ்ஸியின் மேலும், FIFA மேலும் தொடர்ந்து பல்வேறு குற்றச்சாட்டுகள் கால்பந்து ரசிகர்களிடமிருந்து தொடர்ந்து விழுந்து கொண்டிருக்கின்றன. நான் முழுவதுமாக அதில்  விழுந்து விடவில்லை. இருந்தும் நடப்பவைகள் பலவும் அந்தக் கேள்விகளுக்கு உரம் கொடுக்கின்றன.

ஸ்விஸ் வீரர் முதல் சில நிமிடங்களிலேயே கோல் அடித்தார். அதற்கு ஈடான கோலை அடிக்க அர்ஜென்டினா 67 நிமிடங்கள் எடுத்து ஈடு செய்தது. இரு பாதிகள் முடிந்த நிலையில் தலா ஒரு கோல் என்ற நிலை இருந்தது. ஆனால் அதற்குள் அந்த இறுதி நிமிடங்களில் ஸ்விஸ் அணியின் எம்போலா, இன்னொரு ஸ்விஸ் வீரர் இருவரும் ஒரு அர்ஜென்டினா வீரரும் foul ஒன்றில் மாட்டிக் கொண்டனர், எம்போலா அந்த foulலை வைத்து அர்ஜென்டினா வீரருக்குத் தண்டனை கொடுக்க நடுவரிடம் கேட்டார். அவர் VAR பார்த்து விட்டு, அந்த அர்ஜென்டினா வீரருக்கு முன்பே எம்போலா தவறு செய்துள்ளார்  அல்லது போலியாக அடிப்பட்டது போல் நடித்துள்ளார் என்று அவருக்கு மஞ்சள் அட்டை காண்பித்தார், இதில் சோகம் என்னவென்றால், எம்போலாவிற்கு ஏற்கெனவே மஞ்சள் அட்டை கொடுத்திருந்ததால் இப்போது அவருக்கு சிகப்பு அட்டை என்றாகி விட்டது. ஆகவே அடுத்து வரும் extra timeல் அவர் விளையாட முடியாது. இப்போது 11 அர்ஜென்டினா வீரர்களுக்கு எதிராக 10 ஸ்விஸ் வீரர்கள் விளையாடுவார்கள். அதிக ஆள் பலத்தினாலோ என்னவோ அப்பகுதியில் இரு கோல்களைப் போட்டு 3 : 1 என்ற கணக்கில் அர்ஜென்டினா வென்றது.

 என்னைப் பொறுத்தவரை இரண்டாவது மஞ்சள் அட்டை  கொடுப்பதற்கு முன் நடுவர்கள் கொஞ்சம் யோசித்தே கொடுப்பார்கள். இங்கே விளையாட்டு வீரர் foul  செய்யவில்லை. ஆனால் foul நடந்ததுபோல் நடித்தார் என்பதற்காக இரண்டாவது அட்டையைக் கொடுத்தது எனக்கு அதிக பட்ச தண்டனையாகத் தோன்றியது.

மெஸ்ஸியின் எதிராளிகள் சொல்வது போல் மெஸ்ஸிக்கு நடுவர்கள்  சாதகமான முடிவுகளையே எடுக்கிறார்கள் என்று சொவதில் உண்மை இருக்கிறதோ என்றும் தோன்றுகிறது. லீக் ஆட்டத்தில் ஒரு தடவை மெஸ்ஸி எதிராளியின் காலை மிதித்து foul செய்தும் அவர் தண்டிக்கப்படவில்லை என்பதையும் நினைத்துக் கொண்டேன்.  எம்போலா ஒரு முக்கியமான முன்னணி வீரர். Lead striker. அவரை வெளியே அனுப்பவே இந்த முடிவெடுக்கப்பட்டது என்று ஸ்விஸ் வீரர்களின் வெளிப்பாடாக இருந்தது. அதைத் தவறு என்று சொல்ல முடியாது.

ஏற்கெனவே எகிப்து அணியின் ஒரு கோலை நடுவர் ரத்து செய்தது pro-Argentina or pro-Messi move என்ற விவாதம் கடுமையாக எழுந்தது.

 

 

 

1380. சண்டையோ சண்டை & தமிழும் வாழ்க ...

இன்னைக்கு அர்ஜென்டினா மேட்ச். ஸ்விட்சர்லாந்து நாட்டோடு போட்டி. கால் இறுதிப் போட்டி. அப்படின்னு சொன்னாங்க சரி காலையில் எழுந்து பார்ப்போம் என்று ஆறு மணிக்கு அலாரம் வச்சேன் பார்த்தா 3 மணிக்கே எழுந்துட்டேன். நான் அந்த மாதிரி எழுகிற ஆளு கிடையாது. தூக்கம் போயிரிச்சு. நல்லாவே முழிச்சிட்டேன். யாருடா நம்மளை இப்படி எழுப்புனான்னு பார்த்தா அது நம்ம மெஸ்ஸி. .பாவம் அவர். நம்ம தமிழ் சினிமாவில வரும் கோர்ட் சீன் மாதிரியே எனக்கு தெரிஞ்சுச்சு. அதுல உத்துப் பார்த்தேன். அந்த கோர்ட்ல குற்றவாளிகள் நிக்கிறதற்காக ஒரு கூண்டு இருக்கும்ல .. அந்த கூண்டுக்குள்ள பரிதாபமா நம்ம மெஸ்ஸி நின்னுட்டு இருந்தார். என்னடா இவர் இங்கே நிற்கிறார் என்று பார்த்தால் கருப்பு அங்கி அணிந்த இரண்டு வழக்கறிஞர்கள் நிற்கிறார்கள்.  அது யாருன்னு பார்த்தா, நாங்க ஒரு whatsapp குரூப் வச்சிருக்கோம் அதுல ரெண்டு குரூப்பா பிரிஞ்சி மக்கள் சண்டை போட்டுக்கிட்டு இருப்பாங்க. அந்தச் சண்டைக்கு தலைவரா இருக்கிறவங்கதான். அவங்க பேரு உங்களுக்கு எதுக்கு? இப்படி வச்சுக் கொள்வோம். ஒருவர் பெயர் D. இன்னொருவர் V. முதல் ஆள் இருக்காரே ... அப்படியே உலகத்துல உள்ள புட்பால் பூரா எனக்கு அத்துபடி அப்படின்னு சொல்லுவாரு அவரு கட்சி என்னவென்றால், ரொனால்டோ தான் பெரிய ஆள். அவர் தான் உப்ட்பாலுக்கே ஆடு – அதாவது GOAT – என்பார். இன்னொருத்தர் மெஸ்ஸி ஆளு. அவரே உன்னதமானவர். உயர்ந்தவர் என்பார். இரண்டு பேரும் உலகத்தில் சிறப்பா விளையாடுறது எங்க ஆளுகதான். அந்தந்த அணி மட்டும்தான் கடைசி வரைக்கும் வரும்; வெற்றி பெறும் என்பார்கள்.  அநியாயமா இரு கட்சிகளும் ரொம்ப சண்டை போடுவாங்க. அப்போ நான் ஒண்ணு சொன்னேன். அந்தக் காலத்துல சிவாஜி, எம்ஜிஆர்,  இருவரில் யார் பெரியவர், சிற்ந்தவர் என்று அவரது ரசிகர்களுக்குள் போட்டி நடக்கும். எங்களுக்கு அப்போது பதில் கிடைக்கல. ஆனா இப்ப கிடைச்சிருச்சு சோ காலம்தான பதில் சொல்லணும் மெஸ்ஸியா ரொனால்டோவா யாரு பெரிய ஆளுன்னு காலம் தான் முடிவு பண்ணும்.  இப்ப நீங்க சண்டை போடாதீங்கன்னு சொல்லிப் பார்த்தேன் கேட்கிறது மாதிரி இல்ல. அட போங்கப்பான்னு உட்டுட்டேன்.

 

 சரி இது இப்படி இருக்குன்னா இன்னொரு பக்கம் எரிச்சலான ஒரு விஷயம் அந்த குரூப்ல இருக்கும். எங்க whatsapp குரூப்பில் இருக்குற எல்லாருமே ரொம்ப படிச்ச மக்கள். நிறைய பேரு கணினியில் ஆணி புடுங்குற வேலை பார்க்கிறவங்க. பெரிய பெரிய வேலை பார்க்கிறவங்க. ஒரு நாள் மேட்ச் பாத்துட்டு அந்த குரூப்ல இருக்கேன். ஒருவர் அந்த ஃபுட்பால் நடந்துகிட்டு இருக்கிற மைதானத்தில் இருக்கிறாராம். அவர் அங்க இருந்துகிட்டு இங்க வெப்பம் 20 டிகிரிதான் இருக்கு. இவங்களுக்கு எதுக்கு தண்ணி காட்ற நேரம் அப்டின்னு கேட்கிறார். அதாவது அந்த விளையாட்டு வீரர்களுக்கு எதற்கு HYDRATION BREAK. என்று ஒரு நியாயமான

கேள்வியை முன் வைக்கிறார். இன்னொருத்தார் கல்ஃப் நாட்டில் இருந்து விளையாட்டைப் பார்த்துக் கொண்டிருக்கிறார். ஈரானின் குண்டு வெடிப்பு சத்தமும் எங்கள் பகுதியில் நடக்கிறது என்று வெகு சாதாரணமாகக் கூறிக் கொண்டு விளையாட்டைப் பார்த்துக் கொண்டிருக்கிறார்.

 

அப்போ எல்லோரும் நல்ல படிச்ச ஆளுக. ஆங்கிலமும் தாய்மொழியும் நன்றாகத் தெரிந்த ஆட்கள். படிக்காத பாமரர்கள் யாரும் அங்கில்லை. ஆனால் நான் அந்த க்ரூப்பில் சேரும்போது பொதுவாகப் பலரும் தங்லீஷில் எழுதிக் கொண்டிருந்தனர். இருசக்கர வண்டி ஓட்டிக்கிட்டே போன் பேசும் முட்டாள்களைப் பார்க்கும்போது எனக்கு வரும் கோபம் வரும். முன்பெல்லாம் அந்த மாதிரி ஆட்களைக் கன்னாபின்னாவென்று திட்டுவேன் – அவர்கள் காதில் விழுமளவிற்கு. இந்த விஷயத்திலும் அப்படி ஒரு கோபம்  வருவதுண்டு. அதனால் எல்லோரும் ஆங்கிலம் அல்லது தமிழில் மட்டும் எழுதுங்களேன் என்று ஒரு வேண்டுகோளை வைத்தேன். அதைச் சீந்த யாருமில்லை. தொடர்ந்து தங்லீஷ் தான். தமிழ் app இல்லை என்று ஒரு காரணத்தையோ, phonetic typing தெரியாது என்று

இதற்கெல்லாம் காரணம் சொல்வார்கள். அப்டின்னா ஆங்கிலத்தில் எழுதுங்க .. படிச்சவங்கதான் நீங்க அப்டின்னேன். அவங்க எழுத முடியாதுன்னா .. அப்போ என்ன முடிவுக்கு நான் வரணும்? எனக்கு வந்த முடிவு .. பலருக்கு ஒரு compkex. ஆங்கிலம் தப்பு தப்பா எழுதிடுவோம் என்கிற பயம். அப்போ தமிழில் எழுதணும். அதுக்கு prestige ஒரு தடை. நான் பொதுவா தங்லீஷ் வாசிக்கிறதேயில்லை. இதுல பலரும் தங்கிலீஷ்தான். இதில் தமிழ் எழுத்தாளர்கள், தமிழ்க் கவிஞர்களும் இருந்தார்கள் என்பதும் ஒரு வேதனையான, வேடிக்கையான உண்மை. நம் தாய்மொழியை அடியோடு அழித்துவிடலாம் என்று தான் படித்த இந்த மக்கள் கங்கணம் கட்டிக் கொண்டிருக்கிறார்களோ? இருக்கும்.

 

பேசாமல் வெளியேறிடலாம்னு நினச்சேன். இந்த க்ரூப் 2022 இருந்தே இருக்கிறது. உலகக்கோப்பைக்கு மட்டும் உயிர்த்தெழும். நம்மையும் விரும்பி சேர்த்தார்களே என்ற எண்ணமும், விளையாட்டின் மீதிருந்த காதலும் தடைகளாக இருந்தன; இருக்கின்றன.

 

சரி ... காலையில் வெகு சீக்கிரமே எழுந்தேனே... ஆட்டம் பார்க்கவில்லையா என்று கேட்பீர்கள். டல்லான முதல் பகுதி ஆட்டம். இரண்டாம் பகுதியில் கொஞ்சம் சூடு ஏறியது. நாளை அது பற்றிப் பேசுவோமே ...

 

ஏன் மெஸ்ஸி கூண்டில் நின்றார் என்றும் கேட்பீர்கள். அதைப் பற்றியும் எழுதணும்.

 

 

1379.. இங்கிலாந்து - காங்கோ 2:1

 

இங்கிலாந்து – காங்கோ விளையாடும்போது மனசு என்னவோ காங்கோ பக்கமே இருந்தது. விளையாட ஆரம்பித்த 7 நிமிடத்திலேயே காங்கோ முதல் கோல் போட்டது. I’m always an anti-england guy. ரொம்ப மகிழ்ச்சியாகப் போய்விட்டது. விளையாட்டும் விறுவிறுப்பாகப் போனது. ஆட்டத்தின் நடுவில் right ex-ல் ஒரு பரட்டைத் தலையோடு ஒருவர் நன்கு விளையாடிக்கொண்டிருந்தார். விளையாடியவர்கள் – இரு அணியிலுமே – கருப்புத் தோல்காரர்களே அதிகமாக இருந்தார்களா ... நானும் 8ம் எண்ணுடன் விளையாடிய அவரையும் ஒரு ஆப்ரிக்கக்காரராக நினைத்திருந்தேன். முதல் பாதி விளையாட்டில் தீப்பொறி பறந்தது. இங்கிலாந்து அணி முதல் பாதியில் முழுமையாக முயன்றும் கோல் விழவில்லை. காங்கோ அணியின் கோல் கீப்பர் மிகத் திறமையாகத் தடுப்பாட்டம் கொடுத்தார்.

இரண்டாம் பகுதி ஆரம்பித்த பிறகே அந்த 8ம் நம்பர் பரட்டைத் தலைக்காரரின் பெயர் ஓரிரு தடவை காதில் விழுந்தது. நாம் சரியாகத்தான் கேட்கிறோமா என்று நினைத்தேன். வர்ணனையாளர்கள் சொன்ன ஒரு பெயர் வித்தியாசமாகக் கேட்டது. எனக்கே சந்தேகத்தோடு மீண்டும் கேட்டேன். நிச்சயமாக முத்துசாமின்னு தான் எனக்குக் கேட்டது. இருந்தாலும் முழு நிச்சயமாகத் தெரியவில்லை.

விளையாட்டு வேகமாகப் போனது. இங்கிலாந்தின் முதன்மை வீரர் கேன் இரண்டு கோல்களையும் அடுத்தடுத்துப் போட்டு இங்கிலாந்தின் வெற்றியை உறுதிப்படுத்தினார். எனக்கு சோகம் தான். அத்தனை தீவிரமாக விளையாடியும் காங்கோ தோல்வியைத் தழுவியது. தோற்றாலும் நன்கு விளையாடித் தோற்றனர்.

ஆட்டம் முடிந்ததும் வேகமாக கூகுள் ஆண்டவரிடம் ஓடினேன். காங்கோ அணி வீரர்களின் பெயர்ப் பட்டியலைப் பார்த்தேன். இந்திய், தமிழ்நாட்டிலிருந்து பிரான்சில் பிறந்து காங்கோ நாட்டின் கால்பந்தணியில் இடம் பிடித்துள்ளார். அடடா ... இது தெரிந்திருந்தால் இன்னும் அவர் விளையாட்டைத் தீவிரமாகக் கவனித்திருக்கலாமே என்று தோன்றியது. பார்த்தவரையில் அவர் 16 வயதினிலே வரும் “பரட்டை” மாதிரியே இருந்தார். கொஞ்சம் பெருமை தான் – நம்மாளும் கால்பந்து உலகக் கோப்பையில் விளையாடுகிறாரே என்ற பெருமைதான்.

மீண்டும் ஆண்டவரிடம் இது போல் இந்தியர்கள் விளையாடுகிறார்களா என்று கேட்டேன். நால்வர் இது போல் வெவ்வேறு நாடுகளுக்காக விளையாடுவதாக ஒரு பட்டியல் கொடுத்தது.

Sarpreet Singh 🇳🇿

Samuel Moutoussamy 🇨🇩

Nishan Velupillay 🇦🇺

Tahsin Mohammed 🇶🇦

ஒரு சின்ன மகிழ்ச்சிதான்.